Temyiz arizasında imaye tarafı Şihametovnıñ taqip etilüvi «qanunğa esaslanmay», dep israr etti.
«Aslında, 2005 senesinden başlap, «Terrorizm ile küreş» federal qanunına köre, ameldeki qanunlarğa köre, «Hizb-ut-Tahrir» terror teşkilâtı olaraq tanılmay, diger hulâsalar ise cinaiy taqipke çekmek içün uquqiy bir sebep degil», – dep qayd etti advokat Kurbedinov.
Şihametov mahkemede «terrorist degilim», dep ayttı. Onıñ qayd etkenine köre, «saba saat dörtte insanlar evine sürip kirip, terrorizmde qabaatlağanda ve büyük apis cezasını bergende» o,»öz toprağında barışıq içinde yaşağan edi», dep qayd etti.
«Sağlığı yaramay. Onı teskerede ketirgenler, şimdi hastahanede yata ve zornen areket ete. Omurğa, ciger, büyrek problemleri ciddiy dedi – bir sıra başqa hastalıq da bar. Bu vaqıt devamında bir saqat oldı. Maneviy ceetten yahşı dayana, ruhtan tüşmey. Tek onıñ içün degil, epimiz içün bir imtian olğanını añlay», – dep qoştı Kurbedinov.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi sentâbrniñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.