Aqmescitte yaqın saatlarda ava bozulacaq: sağanaq, boranlı yağmur ve burçaq yağacaq, şeerde furtuna havfı ilân etildi, dep haber ete Qırımdaki Rusiye Fevqulâde vaziyetler nazirligi idaresiniñ matbuat hızmeti.
«Qırımnıñ gidrometeorologiya ve tabiat monitoringi idaresiniñ malümatına köre, yaqın bir-üç saatta ve künniñ soñuna qadar Qırımda ve Aqmescitte küçlü sağanaq, boranlı yağmur burçaq yağması, saniyede 20-25 metr süratlı yel esmesi beklenile», – dep aytıla müessiseniñ haberinde.
Qurtarıcılar yaramay avada soqaqqa çıqmamağa, sağanaq vaqtında yerastı keçitlerge kirmemege, balaban terekler altında saqlanmamağa ve yaramay pekitilgen inşaatlar yanında olmamağa tevsiye ete.
Hatırlatamız, iyünniñ 24-nde Qırımda ava bozulğan edi: Yaltada bir qaç soqaq ve yerastı keçit suv altında qaldı, Aqmescitniñ bir qısmı ise elektrik hatları bozulğanı içün ışıqsız qaldı.