Yaltadaki «Hizb ut-Tahrir davasınıñ» mabüsi Emir-Üsein Kukunıñ ömür arqadaşı onı Aqmescit SİZOsında ziyaret etti. Meryem Kukunıñ Facebookta yazğanına köre, fevralniñ 11-nde aqayı apiske alınğanına 3 yıl tola.
«Bugün balalarnen beraber Emir-Üseinnen körüştik. Balalar babasını üçünci kere köre… Elbette, körüşüv vaqtında balalar Emirnen nevbetnen laf ettiler… Bekir babası azatlıqqa çıqqan soñ ilk evelâ acılıqqa barmağa teklif etti, Safiyeçikke ise Emir-Üsein Parijge barmağa teklif etti. O, beklemegeninden ne aytacağını şaşırdı… Emir-Üsein pek duyğulandı, yanında olğan er keske selâm aytıp teşekkürler bildirdi», – dep yazdı Meryem Kuku.
Onıñ aytqanına köre, dava Rostov-na-Donu şeerindeki Şimaliy-Kavkaz okrugınıñ arbiy mahkemesine baqılması içün yollanılacaq.
Daa evel haber etilgeni kibi, Yaltadaki «Hizb ut-Tahrir davasınıñ» altı mabüsi de Rusiyeden işğal etilgen Qırımğa avuştırıldı, çünki dava tekrar tahqiqatqa ve qabaatlavlarnıñ deñiştirilüvine qaytarıldı.
2019 senesi yanvar ayında Qırımda Rusiye tahqiqatı Yaltadaki «Hizb ut-Tahrir davasınıñ» mabüslerine yañı qabaatlarını aydınlattı.
2018 senesi noyabrniñ 22-nde Rusiye mahkemesi Yaltadaki «Hizb ut-Tahrir davasınıñ» mabüslerini apiste qaldırdı. Olar 2019 senesi fevralniñ 28-ne qadar SİZOda bulunacaqlar.
Your browser doesn’t support HTML5
«Erte ya da keç adalet yeñecek» – Emir-Üsein Kukunıñ oğlu (video)
Bu dava boyunca qabaatlanğanlar Arsen Cepparov, Refat Alimov, Emir-Üsein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtında iştirak etkeninde qabaatlana.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.