Yaltadaki «Hizb ut-Tahrir davasınıñ» altı mabüsini Aqmescit SİZOsından Rusiyeniñ Rostov-na-Donu şeeri tarafına alıp ketkenler. Anda olar martnıñ 12-ne planlaştırılğan mahkeme oturışuvında iştirak etecekler. Bu aqta advokat Sergey Legostov Qırım.Aqiqat mühbirine bildirdi.
«Bugün müvekkillerimizniñ Aqmescit SİZOsında Rostovğa avuştırılması – beklengen bir şey. Tünevin davamız boyunca Şimaliy-Kavkaz okrugınıñ arbiy mahkemesi ile video bağı vastasınen oturışuvımız oldı, dava mabüslerine qabaatlav qararı oquldı. Martnıñ 12-nde daa bir oturışuv olacaq», – dep tarif etti advokat.
Yaltadaki «Hizb ut-Tahrir davasınıñ» altı mabüsi Rusiyeden işğal etilgen Qırımğa avuştırılğan edi. Olarnıñ davaları tekrar tahqiqatqa qaytarılğan ve qabaatları deñiştirilgen edi.
2019 senesi yanvar ayında Qırımda Rusiye tahqiqatı Yaltadaki davanıñ mabüslerine yañı qabaatlarını aydınlattı.
Your browser doesn’t support HTML5
«Erte ya da keç adalet yeñecek» – Emir-Üsein Kukunıñ oğlu (video)
Bu dava boyunca qabaatlanğanlar Arsen Cepparov, Refat Alimov, Emir-Üsein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında Yaltada tutulğan edi. Olar Rusiyede yasaqlanğan «Hizb ut-Tahrir» islâm siyasiy teşkilâtında iştirak etkeninde qabaatlana.
Ukraina Tış işler nazirligi Rusiyeden Yaltadaki «Hizb ut-Tahrir davasınıñ» mabüslerini azat etmesini talap ete.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.