Yaltada elektrik meseleleri sebebinden suv berilmesi sıñırlanacaq – suv tek aqşam berilecek, dep haber ete Qırımnıñ Cenübiy yalısı Vodokanalı.
"2026 senesi Oraqnıñ 22-de suv berüv aqşam – saat 19:00-den 22:00-ge qadar keçirilecek", — dep, qayd etile beyanatta.
Evel Qırımda bir gecede patlavlar eşitilgeni, Ukrayin dronlarınıñ uçqanları közge çarpqan, Rusiyeniñ köçme yanğın söndürici gruppaları çalışqanları, Yalta ve Aluştadaki elektrik podstantsiyalarında yanğınlar çıqqanı aqqında haberler berildi.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.