Yaltada beş mustaqil ev ve bir çoq qatlı binanı suv bastı, Aqyar yolunda sel oldı, dep bildirdi Qırımdaki Rusiye Fevqulâde vaziyetler hızmetiniñ idaresi.
"Furtuna havfı vaqtında eñ çoq yağanaqlar mında qayd etildi: Yalta – 21 mm, Kezlev – 12 mm, Aqmeçit rayonı – 10 mm, Nikita qasabası – 7 mm (burçaq), Aqşeyh rayonı – 5 mm, Aqmescit – 4 mm", – dep aytıla haberde.
Rusiye kütleviy haber vastaları ve içtimaiy ağlarnıñ Qırımlı qullanıcıları suv basqan Yalta – Aqmescit yolunıñ resimlerini derc ete, anda sel aqibetleri körüne. Yol areketi şimdilik qıyın.
Rusiye Fevqulâde vaziyetler hızmeti iyulniñ 23-nde furtuna havfı aqqında bildirdi.