İşğal etilgen Qırımda salı aqşamı patlav ve atışlar eşitildi. Bu aqta monitoring kanalları ve yerli saifeler bildire.
Exilenova+ Ukrayina kanalı Aqmescitte patlavlar oldı, dep haber etti.
"ÇP📍KRIM" Rusiye kanalı qayd etkenine köre, patlavlar Aqmescitte eşitildi, büyük ihtimal, Mamaq (Strogonovka) köyünde Tavrik TES ve Büyük Yaltada. Aşağı Kikineiz (Ponizovka) qasabasında 110/10 kV "Zarâ" aststantsiyası ve yanğın bölüginiñ binasında issi işaretleri aqqında haber etildi. Bu energetik obyekt evelki ücümlerniñ de nişanı olğan edi.
Aşağı Kikineizde (Ponizovka) qasabasında yanğın olğanını "Krımskiy veter" Qırım pabliki de tasdıqladı. Onıñ malümatına köre, yanğın damında vertolöt meydançığı olğan yanğın bölüginiñ binasında da qayd etildi.
İyulniñ 21-nde saba "Krımenergo" Rusiye devlet müessisesinden kelgen malümatqa köre, Ukrayina Silâlı quvetleriniñ uçucısız ücümleri neticesinde Qırımnıñ Cenübiy yalısındaki mesken yerlerinde elektrik energiyası qısmen yoq.
Energetika saasınıñ vekilleri bildirgenine köre, yarımadanıñ şimali-ğarbi ve şarqında vaziyet qıyın qala. Qayd etilgenine köre, elektrik energiyası energetik rayonlarnıñ vaziyetine köre söndürile.
Bundan ğayrı, Aqyarnıñ Rusiye akimiyeti şeerde iqtisat etüv maqsadınen çeşmeler söndürileyecek, dep bildirdi.
Rusiye ve Ukrayina arbiyleri ücümni şimdilik izaatlamadılar.
Qırım.Aqiqat Cenk vaziyetinde bu malümatnı mustaqil şekilde teşkerip olamay.