Qırımtatarlarnıñ evlerinde keçirilgen kütleviy tintüvlerden soñ 14 künge apiske alınğan Eski Qırımlı faal ve iş adamı Lenur Yakubovnıñ imayesi istinaf şikâyetini berecek ola. Bu aqta advokat Emil Kurbedinov «Qırım birdemligine» ayttı.
Onıñ bildirgenine köre, Yakubovnıñ davası boyunca berilgen vesiqalarda ciddiy bozuvlar bar, mahkeme qararınıñ çıqarılması imkânsız olsa da, mahkemede kene de qarar çıqarıldı.
Faal qabaatını tanımadı ve davağa qoşulğan fotoresimlerde ne olğanı añlaşılmay, dep qayd etti.
«Bu qararğa qarşı istinaf şikâyetimizni berecek müddet bar», – dep qayd etti advokat.
Fevralniñ 29-nda saba Eski Qırımda ve Seyit Eli (Juravki) köyünde Rusiye uquq qoruyıcıları dört qırımtatarı Lenur Yakubov, İzet Sayfullin, İdris Yurdamov ve Şevket Kiyamovnıñ evlerinde tintüv keçirdi. Eski Qırım camisi de tintildi.
Tintüvlerden soñ Eski Qırımlı faal ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfullin tutuldı. İdris Yurdamov ve Şevket Kiyamovnı uquq qoruyıcılar evlerinde qaldırdı. Olarğa qarşı memuriy protokollar tizilmedi.
Daa soñra Sayfullin polis bölüginden yiberildi. Oña qarşı «qanunsız missionerlik faaliyeti» içün memuriy protokol tizildi. Belli olğanına köre, Lenur Yakubovğa qarşı da memuriy protokol tizildi, onı 14 künge apiske alğanlar.
Bundan ğayrı, Rusiye qurğan İslâm-Terek rayon mahkemesiniñ binası ögünde Rusiye uquq qoruyıcıları mahkeme ögünde diñleyicilerni dağıta, «Qırım birdemliginiñ» mühbiri Ali Seytablayevni tuttı. Seytablayev arbiy komissarlıqqa celpname berilgen soñ yiberildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.