Cuma gecesi Qırım yarımadasına sağanaq yağdı. Bazı regionlarda aylıqnıñ 80% qadar tüşti.
"Büyük yağanaqlar esasen yalıda keçti ve deñizge "yahşı" ketti. Bir qaç yıldan berli ekspertler Qırım dağlarınıñ cenübiy tarafından aqqan suvlarğa baqtırılğan suv anbarlarını qurmaq kerek, dep aytalar, amma Rusiye akimiyeti bu imkâniyetni körmemezlikke ura. Neticede yağanaqlar ösümliklerniñ azğarlanmasına yardım etti, lâkin suv anbarlarınıñ tez quruması meselesi toqtatılmadı. Soñki eki yıl içinde turistik saasında bizneske bir qaç milliard ruble berildi, sanki bu, buhran şaraitinde kollektivlerni saqlamaq içün edi, bu paralarnen bir çoq suv anbarı qurmaq mümkün edi. Turizm - turistik şirketlerniñ sayısı degil de, turistler içün keyfiyetli şaraitler, şu cümleden mevsimde suv kesilmemesi, dep añlamağa vaqıt keldi", — dep izaatladı Qırım.Aqiqatnıñ #LiberateCrimea adlı faali, onıñ soyadını muarririyet telükesizlik maqsadınen aytmay.
Faalniñ qayd etkenine köre, Şimaliy-Qırım kanalına suv tökülmesi devam ete, bu ise Qırımnıñ suv obyektlerini toldurmaq içün yağmur suvlarınıñ semereli qullanılmağanını köstere.
Büyük Qarasuv özeni Qarasuvbazar ve Taygan suv anbarları altında
"Yağanaqlardan soñ Qarasuvbazar ve Taygan suv anbarlarınıñ miqdarı biraz artar dep tüşündik, amma yoq, bayağı intensiv şekilde töküle. Taygan suv anbarında suv seviyesi o qadar tez tüşe ki, peyda olğan ada tezden çölge çevirilecek. Bundan soñ sinoptikler otuz kün devamında sıcaq olacağını tahmin eteler, bu sebepten yağmur suvları deñizge ketkeni yazıq ki", — dep qayd etti faal.
Taygan suv anbarında ösken ada
Yaznıñ başından berli Qırımda özen ve suv anbarları tez saylaşa. Qrasuvbazar suv anbarında vaziyet kerginleşe, anda suv anbarınıñ cenübiy qısmı qurudı. Qırımda suvnıñ qullanuvı aqımından bayağı yüksek, bu ise suv qıtlığına ketire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.