Amerika Qoşma Ştatlarınıñ Devlet departamentiniñ Ukraina işleri boyunca mahsus vekili Kurt Volker Ukraina prezidenti saylavları arefesinde, AQŞ demokratik Ukrainağa qol tutqanını ayttı, ve, Ukraina, ilhaq etilgenQırımnen beraber öz topraqları altında nezaretini qaytaracağında eminlikni ifade etti.
“Bazar künü keçecek saylav arefesinde kene tasdıqlayım ki, AQŞ mında barışıq, küçlü, demokratik, havfsız Ukrainağa, öz sıñır veQırım ile qalğan topraqlarını ğayrıdan tiklemege niyetlengen Ukrainağa qol tutmaq içündir”, - dep yazdı Volker Twitterde.
Ukraina saylavlarınıñ ekinci basamağı aprelniñ 21-inde keçirilecek.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.