Pervasız olmağan insannıñ taliyi. Seyran Saliyevniñ ikâyesi (video)

Seyran Saliyevniñ adı haberlerde tevqifinden bayağı evel – 2017 senesiniñ oktâbrinde peyda oldı. Seyran Saliyev başqalarnıñ problemalarına pevasız qalmay edi, ve Rusiye telükesilik hadimleri tarafından taqip etilmesi de bundan başlandı: oña, olmağan miting içün cöreme tayin ettiler, oña büyük cöremeler tayin etildi ve o, 12 künge tevqif etilgen edi. 2017 senesiniñ oktâbrinde Seyrannı ve Bağçasaraydan daa beş qırımtatarnı Rusiyede yasaq etilgen «Hizb ut-Tahrir» İslâm teşkilâtına ait olğanlarında qabaatlav boyunca tevqif ettiler. Endi 8 aydan ziyade Seyran tahqiqat izolâtorında buluna. Onıñ içün 20 yılğa azatlıqtan marum etilmek telükesi bar. «Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız olaraq taqip etilgenlerini aytalar. Rusiyeniñ Yuqarı mahkemesi «Hizb ut-Tahrir»ni, terrorizmge alâqası olğanında qabaatlap, yasaq etti. Aq-uquq qorçalayıcıları «Hizb ut-Tahrir işi» boyunca tevqif ve mahküm etilgenlerni siyasiy mabüsler, ve olarnıñ taqip etilmesini, diniy alâmetke köre yapıla, dep sayalar.