Qırımda alıp qaçuvlar: insanlar ne yerde ğayıp ola? (video)

Rusiyeniñ Qırımğa basıp kirgeniniñ birinci künlerinde belli olmağan kamuflâjlı adamlar Reşat Ametovnı yaqaladı ve alıp kettiler. Eki aftadan daa qısqa müddetten soñ o, ölü tapıldı. Qatillerniñ kimligi ise ale daa tayin etilmedi. Dünya Qırımtatar Kongressi İcra komitetiniñ azası Ervin Umerov belli olmağan şahıslar tarafından 2016 senesi mayıs 26-da alıp qaçıldı. Bu sene mayıs 23-te Qırım telükesizlik hadimleri Qırımtatar Milliy Qurultayınıñ delegatı Asan Egizni alıp qaçtılar. Ertesi künü o, endi evge qayttı ve olıp keçken adise aqqında özü ikâye etti. «QırımSOS» insan aqlarını qorçalav gruppasınıñ esaplamalarına köre, yarımadanıñ ilhaqından soñ 44 insan alıp qaçıldı, 16 insan habersiz ğayıp olğan sayıla, 6 insan ise endi ölü tapılğan edi.