Türkiye: İstanbulda qırımtatarlarğa qarşı genotsid qurbanlarınıñ hatırasını ürmet ile añdılar (video)

İstanbulda, qırımtatar halqını sürgün etüv qurbanlarınıñ hatırasını ürmet ile añmaq içün miting-dua yapıldı. Tedbirde Ukraina Baş konsullığı ve Türkiye ukümetiniñ vekilleri, qırımtatar cemaatlarınıñ başlıqları ve Türkiye vatandaşları ile vaqtınca köçken Ukraina vatandaşları olğan qırımtatarlar iştirak etti. Tedbir, qırımtatarlar toplu yaşağan Çatalca adlı rayonda, 1944 senesinde sürgün etüv qurbanlarınıñ eykeli yanında keçirildi. Bir anane olaraq tedbir sessizlik daqqasından ve Türkiye ile qırımtatar halqınıñ milliy marşlarından başlandı. Ondan soñ yerli caminiñ diniy hadimi 1944 senesi mayıs 18-de sürgün etüv qurbanlarınıñ hatırasına dua keçirdi. Eykelge çiçekler qoyuldı ve rezolütsiyanı oqudılar. Onda sovet ukümetiniñ qırımtatarlarğa qarşı areketleri ve 2014 senesinde Rusiye tarafından Qırımnıñ ilhaqı taqbih etildi.