«Tükürüv işi»: Qırımda mahkeme, faaliyetçi Razzakovğa polis hadimine aqaret etkeni içün cöreme tölenmesi tayin etti (video)

Bağçasarayda mahkeme, vazife mecburiyetlerini eda etken ukümet vekiline halq ögünde aqaret etkeninde qabaatlanğan qırımtatar faaliyetçisi Şevket Razzakovnıñ işi boyunca uküm çıqardı. Mahkeme onı qabaatlı tanıdı ve oña 20 biñ ruble miqdarında cöreme tölenmesini tayin etti. Tahqiqatnıñ versiyasına köre, 2017 senesiniñ aprelinde Bağçasaray sakini Seydamet Mustafayevniñ evi tintilgende Razzakov polis hadimine tükürdi. Mustafayev Razzakovğa qol tutmaq içün mahkemege keldi. Onıñ fikrine köre, böyle cinaiy işler – Rusiye telükesizlik hadimleriniñ qırımtatarlarnı, tintüvler vaqtında bir-birine qol tutmasınlar dep, qorquzmaq teşebbüsidir. Daa evel İslâm-Terek (Kirovskoye) qasabasında Rusiye mahkemesi Eski Qırım sakini Zarema Kulametovanı da aynı madde boyunca – polis hadimine halq ogünde aqaret etkeni içün qabaatlı tanıdı. Razzakovnıñ işi boyunca mahkeme cöreme şeklinde cezalav ile sıñırlanğan olsa, Kulametovağa kelgende, uküm daa sert edi: 250 saat mecburiy cemiyet işi ve zarar körgen polis hadimine kompensatsiya olaraq 20 biñ ruble cöreme.