Emir-Usein Kuku: aq-uquq qorçalayıcılardan siyasiy mabüsler sırasına (video)

Qırım.Aqiqattaki «Siyasiy mabüsniñ tarihı» videoblogında Emir-Usein Kukunıñ aqlarnı qorçalav saasındaki faaliyeti ve bir çoq hobbileri, evindeki tintüvler ve tevqif etilgen soñ siyrek körüşüvleri aqqında ikâye etile. Emir-Useyin Kuku tevqif etildi ve Rusiyede yasaq etilgen «Hizb ut-Tahrir» siyasiy İslâm teşkilâtına alâqası olğnaında qabaatlandı. Soñundan onıñ qabaatlavına daa bir madde ilâve etildi – küç qullanaraq akimiyetniñ öz qoluna keçirilmesine azırlanuv. O, 25 yılğa azatlıqtan marum etilmek mumkün. «Memorial» insan aqlarını qorçalav merkezi Kukunı siyasiy mabüs olaraq tanıdı, Amnesty International halqara insan aqlarını qorçalav merkezi ise oña «vicdan mabüsi» dedi. «Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köre. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi «Hizb ut-Tahrir»ni terrorizmge alâqalı olğanında qabaatlap, yasaq etti. Aq-uquq qorçalayıcıları «Hizb ut-Tahrir işi» boyunca tevqif ve mahküm etilgen Qırım sakinleriniñ özlerini siyasiy mabüsler, ve olarnıñ taqip etilmesini, diniy alâmetke köre yapıla, dep sayalar.