Dilâver Memetov. «Qırım birdemligi»niñ koordinatorı ve siyasiy mabüsniñ oğlu (video)

2016 senesi mayıs 12-de yaqalanğan Remzi Memetov al-azırda Aqmescitniñ tahqiqat izolâtorında buluna. Onı, «Hizb ut-Tahrir» teşkilâtına alâqası olğanından şübheli tanıp, «zornen akimiyetni zapt etüv»de qabaatlaylar. Babası tevqif etilgende Dilâver Memetov Qırım aliy oquv yurtlarından birinde himiya fakultetiniñ magistraturasını bitirmek üzre olıp, aspiranturağa kirmekni planlaştıra edi. Aliy oquv yurtunda o, ilmiy işi üstünde çalışmağa devam etecegi aqqında añlaşqan edi. Babası yaqalanğan soñ Dilâver daa yarım yıl institutta çalıştı, lâkin 2016 senesiniñ oktâbrinde yañı bir tevqifler dalğası onı ilmiy işni vaqtınca taşlamağa mecbur etti. Bugün Dilâver «Qırım birdemligi» birleşmesiniñ koordinatorı ola. İlhaq etilgen Qırımda alıp qaçılğan ve tevqif etilgenlerniñ yaqın aqrabaları nasıl etip faaliyetçi ola – bu hususta Qırım.Aqiqatnıñ «Qandaş qorçalayıcıları»-https://ru.krymr.com/a/crimean-defenders/29145368.html materialında oquñız. «Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetine köre yapılğanını tüşüneler. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd eteler. «Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti. Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.