«Eñ çoq onı Qırım meraqlandıra edi»: Cemilevniñ tatası qardaşını ayta (video)

15 noyabr 2018, 20:34

Your browser doesn’t support HTML5

Başta pek yahşı oqumay edi, amma üyken sınıflarda tillerni ve qırımtatar halqınıñ tarihını ögrenmege başladı, dep tarif ete qardaşı Mustafa Cemilevniñ büyügenini tatası Vasfiye Hairova. O, Qırım.Aqiqat ile subetleşip, ayatını halqınıñ vatanğa qaytması içün küreşke bağışlağan qırımtatar halqınıñ lideriniñ gençlik ikâyelerini paylaştı. 2018 senesi noyabrniñ 13-nde Mustafa Cemilev 75 yaşını qayd etti. Qırımtatar halqınıñ aqları oğrunda küreşip, o, ürmet ve milliy lider statusını qazandı.

Qırımtatarlarnıñ lideri Mustafa Cemilev – eñ belli sovet dissidentlerinden biri. 1966-1983 seneleri devamında o, altı kere apiske alınğan edi. Yedi kere mahküm etilgen Cemilev «sovetler qurumını aqaretlegen fikirleri» içün 15 yıl apiste yattı. 1975-1976 seneleri Omsk apishanesinde 303 kün açlıq narazılığını tuttı. 1986 senesi azatlıqqa çıqtı.

1991 senesinden 2013 senesine qadar Qırımtatar Milliy Meclisiniñ reisi edi. Mustafa Cemilev – III-VII çağırılış Ukraina Yuqarı Radasınıñ halq deputatı. 2014 senesi noyabr ayından berli – VIII çağırılış Ukraina halq deputatıdır. 2014 senesi avgustnıñ 20-nde Ukraina prezidenti Petro Poroşenkonıñ №657/2014 fermanı esasında Ukraina prezidentiniñ qırımtatar halqı işlerinden vekâletlisi olaraq tayin etildi.