Çarşenbe künü, fevralniñ 26-nda, saat 15:00-da Kyivde işğal etilgen Qırımda qırımtatar qorantalarınıñ taqdirlerine bağışlanğan «İşğal reineleri» sergi ekspozitsiyası ve albom prezentatsiyası olacaq.
Bu aqta Qırımtatar Resurs Merkeziniñ matbuat hızmeti bildire.
«Bu insanlar nasıl yaşay? Olarnıñ ayatı nasıl deñişti? Olar angi qıyınlıqlarğa rastkeldi? Aydın kelecekleri içün nasıl küreşe? Neni arz ete? Bu suallerniñ cevabını fevralniñ 26-nda tedbirimizde ala bilesiñiz. Sizni 20 semetdeşimizniñ ikâyesinen tanış olmağa devam etemiz: 10 – memleket içinde köçip kelgen aile, 10 – vaqtınca işğal etilgen Qırımda yaşağan qoranta», – dep aytıla haberde.
Matbuat hızmetiniñ bildirgenine köre, böyle tedbirler medeniyetlerara ve dinlerara dialognıñ qurulmasına, Ukraina devlet organları ve halqara toplulıqnıñ «qırımtatar halqı ve Qırımnıñ qanunsız ilhaqı problemlerine büyük diqqat ayırmasına, em de Qırımnıñ tamır halqınıñ aqlarına riayet etmege ve yarımadanı tez vaqıtta işğalden qurtarmağa yardım etecegine ümüt eteler».
Berilgen malümatqa köre, ilk sergi 2016 senesi Qırımdan Kyivge ketirilgen V.İ.Vernadskiy Tavriya milliy universitetiniñ kontsert salonında (Con Makkeyn soq., 33, Kyiv şeeri) olacaq.
Matbuat hızmetiniñ bildirgenine köre, sergi açılışında Ukraina devlet erbapları, Ukraina halq deputatları, diplomatlar, cemaat faalleri iştirak etecek.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.