İlk yaznıñ 8-nde Rusiyeniñ Novorossiysk şeerindeki "Gruşova" neft bazasına yapılğan ücüm neticesinde eñ azdan dört ya da beş benzin rezervuarı yoq etildi ya da zararlandı, dep köstere uydu resimleri.
Umumen, eki ardı-sıra ücümden soñ 10-15 rezervuar zararlandı, evelki ücüm Ukrayina tarafından eki buçuq afta evel yapıldı.
İlk yaznıñ 8-nde Ukrayina Silâlı quvetleriniñ Baş ştabında bildirdiler ki, pilotsız sistemalar quvetleriniñ 1-inci ayrı merkeziniñ operatorları Mahsus operatsiyalar quvetleri ve mudafaa quvetleriniñ diger qısımlarınen işbirlikte gece Rusiye Federatsiyasınıñ Krasnodar ülkesiniñ Novorossiysk şeerindeki "Gruşova" neft bazasını urdı.
"Obyekt territoriyasında yanğın qayd etildi. Zararnıñ miqdarı daa ögrenilmekte", — dep bildire Baş ştab.
Ştabnıñ malümatına köre, neft bazası Rusiyeniñ cenübinde magistral neft borularınıñ soñ noqtası olğan "Şesharis" ödev kompleksiniñ terkibine kire. Kompleks, Novorossiysk deñiz limanı vastasınen neft ve neft mahsulatınıñ qabul etilmesini, toplanuvını, saqlanuvını ve avuştırılmasını temin ete. Kompleksniñ rezervuar parkınıñ tutumlığı tahminen 1,4 million kubometrni teşkil ete, saqlavnıñ esas yüklemesi "Gruşovaya" meydançığına kele.
Rusiye komandanlığı arbiy obyektlerge urulğanı aqqında haber etmedi. Krasnodar ülkesiniñ operativ ştabı İlk yaznıñ 8-nde saba Novorossiysk şeerindeki yük kompleksinde dron ücüminiñ neticesinde yanğın çıqqanı aqqında haber etti.
Rusiye Mudafaa nazirligi İlk yaznıñ 8-ne keçer gecesi bir sıra vilâyet, şu cümleden Krasnodar ülkesi üzerinde 310 Ukrayin dronunıñ yoq etilgeni aqqında beyan etti.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.