Ukrayina Silâlı quvetleriniñ mahsus operatsiyaları ilk sefer interaktiv "Qarşılıq haritasını" derc etip, vaqtınca işğal etilgen ve işğalden azat etilgen topraqlarda, şu cümleden RF tarafından ilhaq etilgen Qırımda, Ukrayin yerastı faaliyetiniñ neticelerini aydınlattı. Bu aqta USQ-niñ MAQ ve "Suspilne Qırım" haber etti.
Harita saytta bar. Onda Ukrayina Silâlı quvetleri Mahsusu ameliyatlar quvetleriniñ qarşılıq areketiniñ, em de faal, em de zorbalıqsız işğalge qarşı vatandaşlarnıñ öz başına teşkil etilgen qarşılıq areketleriniñ açıqtan belli ve tasdıqlanğan areketleri toplanılğan. Qullanıcılar regionlar boyunca adise-vaqialarnı, vaqıt çizgisini ve bağlı haberlerni baqa bileler.
MAQ, haritada bütün tedbirler aks etilmegenini qayd etti: gizli işniñ büyük qısmı açıq olmağanda, iştirakçilerge, qorantalarına ya da ilerideki vazifelerge telüke ola bile. Tirenüv areketiniñ esas maqsadı — Ukrayina mudafaa ve telükesizlik quvetlerine topraqlarnı duşmanlardan azat etüvde yardım etmek.
Qayd etilgen vaqialarnıñ çoqusı işğal etilgen Qırımğa ait. Hususan, haritada, 2022 senesi Quralayda Kezlevdeki Rusiye memuriyetiniñ qapısına boya tökken Bogdan Ziza ile bağlı dava qayd etilgen. Haritada yarımadada Ukrayina mudafaa quvetleriniñ arbiy ameliyatları da qayd etilgen. Operatsiyalarnıñ çoqusı, sırlı olğanları içün, gizli olaraq belgilengen.
Rusiye akimiyeti vaziyetni izaatlamadı. Qırım.Aqiqat bu malümatnı arbiy areketler şaraitinde teşkeremez.