UNESCO iyulniñ 23-nde "Tavrik Hersones" qoruq müzeyini telükede olğan dünya mirasınıñ obyektleri cedveline kirsetmege qarar aldı. Bu qarar UNESCO Dünya mirası komiteti çerçivesinde 48-inci sessiyada qabul etildi, dep bildirdi Ukrayina Tış işler nazirligi.
Qarar halqara toplulıqnı işğal etilgen Qırımdan medeniy degerliklerniñ qanunsız tarqatıluvına yol bermemek içün işbirligine çağıra, dep bildirdi Ukrayina Tış işler naziri Andriy Sıbiğa.
Bu qararnıñ sebebi qayd etilgen Rusiye tarafından bozuvlar oldı: qanunsız arheologik qazılmalar, abide alanı ve qorçalanğan yerlerde büyük qurucılıq, arheologik köntekstniñ bozuluvı ve medeniy qıymetlerniñ qanunsız tarqatıluvı, dep añlattılar Ukrayina prezidentiniñ Qırım Muhtar Cumhuriyetindeki temsilciliginde.
UNESCO Dünya mirası merkeziniñ müdiri Lazar Elundu Assomo "telükede" cedveline kirsetilmesi ceza degil, obyektlerniñ saqlap qalması içün maliye ve diqqat celp etecek bir alet ola, dep qayd etti.
Ukrayina içün Hersonesniñ "qırmızı cedvelge" kirsetilüvi işğal etilgen topraqlarda Rusiye yıqıcı siyasetiniñ daa bir halqara isbatı olacaq.
2017 senesi UNESCOdan çıqqan, amma komitet azası olaraq qalğan Rusiye medeniy mirasqa zarar ketirgenini inkâr ete.