Ukrayina mudafaa naziri Rustem Ümerov Vashingtonda Avropa Birliginiñ tış işler ve telükesizlik siyaseti yuqarı temsilcisi Jozep Borrel ile körüşti.
Ukrayina mudafaa nazirliginiñ yolbaşçısı Avropa Birligine Rusiyeniñ buzlatılğan aktivlerinden elde etilgen kelirni Ukrayinağa qol tutmaq içün qullanmaq qararına teşekkürler bildirdi.
"Faizlerniñ umumiy miqdarı er yıl 2,5-3 milliard yevro teşkil etecek. 1,4-1,5 milliard yevro miqdarında birinci tranş 2024 senesi avgustnıñ başında kelecek", — dedi o.
Nazirniñ aytqanına köre, Avropa Birligi ve Ukrayina, birinci tranş üç yönelişte masraf etilecek, dep añlaşqanlar:
- silâ
- ava mudafaası vastaları
- ukrayin istisalcılarına qol tutuv
"Qayd etmek kerek ki, AB tarafından maliye etilgen mallar Ukrayinağa 2024 senesiniñ soñuna qadar ketirilmek kerek. Bu qararlar mudafaa qabiliyetimizni pekitmek ve ukrayin istisalcılarına qol tutmaq içün pek müimdir. Avropa Birliginiñ Ukrayinağa bu kritik vaqıtta köstergen destegi ve birdemligi içün minnetdarım", — dep qoştı nazir.
Mayısnıñ 21-nde Avropa Birligi Şurası Rusiyeniñ buzlatılğan devlet aktivlerinden elde etilgen kelirni Ukrayinağa yardım etmek içün celp etmege qarar aldı. Qarar AB Resmiy mecmuasında derc etilgen soñ küç alacaq.
Daa evel Avropa komissiyasında bu resurslar Ukrayinağa 2024 senesi iyül ayından itibaren berilmesi beklenile edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.