Ukrayina mudafaa naziri Rustem Ümerov noyabrniñ 20-nde "Şimaliy gruppa-Ukrayina" formatı çerçivesinde 12 memleket qoşulğan Ukrayinağa qol tutuv yañı alyansınıñ teşkil etilmesi aqqında bildirdi.
O qayd etti ki, memleketler Ukrayinanıñ telükesizligini pekitmek ve oña qol tutmaq içün birleşeler, şu cümleden Danimarka, İsveçiya, Finlândiya, Norveç, İslandiya, Estoniya, Letoniya, Litvaniya, Almaniya, Felemenk, Poloniya ve Büyük Britaniya.
"Bugün böyle formatta ilk körüşüv oldı. Dostum, Danimarka Mudafaa nazirine, liderligi ve musafirligi içün minnetdarım. "Şimaliy gruppa-Ukrayina" formatında nevbetteki toplaşuvnı Ukrayinada keçirmek añlaştıq", — dep ayttı Ümerov.
Ukrayina mudafaa naziri qayd etti ki, körüşüv vaqtında arbiy brigadalarnıñ ağır tehnika ile donatılması ve ukrayin sanayı-qurucılıq tehnikasına yatırımlar muzakere etildi.
Noyabrniñ 11-nde Ukrayina Mudafaa nazirligi ve Sanayı strategik saaları meseleleri nazirligi Danimarka Mudafaa nazirliginen bir sıra amelge keçirüv añlaşmalarını tizdiler. Olar ukrayin mudafaa şirketlerinden 535 million yevro miqdarında satın aluvlarnı közde tuta.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.