Ukrayına akimiyeti Qırım Rusiye ordusından azat etilgen soñ Rusiye vatandaşlarını andan bütünley çıqaruv variantını baqa. Bu aqta Ukrayına prezidentiniñ Qırım Muhtar Cumhuriyetindeki daimi temsilcisi Tamila Taşeva «Ukrayınska pravda» neşiri içün yazğanlarında bildirdi.
Taşeva, laf işğal altındaki Qırım tışında Rusiye Federatsiyasınıñ vatandaşı olğanlar, Ukrayına vatandaşlığı ile bir alâqası olmağanlar ve «vaqtınca işğal etilgen topraqlarda işğalci pasportlaştıruv qurbanı» olmağanlar aqqında kete, dep bildirdi.
«Qırım işğalden azat etilgen soñ Rusiye Federatsiyasınıñ bütün vatandaşlarını çıqaruv variantını baqamız. Ukrayınadan çıqqan soñ olarnıñ kelecegi ve Ukrayınağa qaytuv imkânı Ukrayına qanunlarına köre çezilecek», – dep yazdı Taşeva.
Onıñ qayd etkenine köre, er bir dava «ayrı bqılacaq, çünki bir çoq faktorğa emiyet berilmeli. Meselâ, Qırım platformasınıñ ofisi vaqtınca işğal etilgen topraqlarda yaşağan bazı Rusiye vatandaşlarınıñ Ukrayınağa qoltutqanını bile».
Tamila Taşeva Halqara «Qırım platformasınıñ» Parlament sammiti çerçivesinde Qırım işğalden azat etilgen soñ Ukrayına devletçiligini ğayrıdan tiklevniñ ilk adımlarınen bağlı işniñ yañı strategik yönelişlerini taqdim etti. Bu strategiyanıñ meselelerinden biri vatandaşlıqnen bağlı, hususan işğal vaqtında Qırımğa qanunsız kelgen Rusiye vatandaşlarınen bağlı.
Oktâbrniñ 1-nde Ukrayına istihbarat yolbaşçısı Kırılo Budanov Natalâ Moseyçukqa intervyü berip, Ukrayına Silâlı quvetleri 2023 senesi baarniñ soñuna qadar Qırımğa kirer, dep ayttı.
Ukrayına prezidentiniñ ofis yolbaşçısınıñ mesleatçısı Mıhaylo Podolâk Qırım sakinlerini sığınaqlarnı teşkerip, Ukrayınanıñ «işğalden azat etüv areketleri» sebebinden suv yedeklerini azırlamağa çağırdı. Podolâk, Ukrayına prezidentiniñ ofisi işğal etilgen Qırım sakinleri içün tahliye marşrutlarını azırlay, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.