Ukrayina prezidenti Volodımır Zelenskıy, ortaqlardan Kıyivge Rusiye ballistikası endirilgeni aqqında haber etilmegenini bildirdi.
"Kıyivge ballistika darbeleri oldı, em debayağı alçaq, beş raketa, olar sivil infrastrukturağa uruldı. Yazıq ki, ortaqlardan bu ücüm aqqında bir haber kelmedi. Rus ballistik raketalarınıñ uçurıluvı aqqında malümat insanlarnıñ ayatlarını qurtarmağa yardım ete, ve bu eñ müim meselelerden biridir. Bu, öldürüvlerniñ ögüni almağa yardım ete, çünki ballistik darbe olacaq dep, haber berile", — dep yazdı o telegramda.
Onıñ aytqanına köre, Ukrayina, ABD prezidenti Donald Tramp tarafından energetik barışıq ilân etilgeninden berli eki kün devamında Rusiye cermay zavodlarına ve umumen energetikağa ücüm etmedi, amma Rusiye Trumpnı diñlemedi.
"Bu vaqıt devamında rusiyeliler bizim energetik obyektlerimizge ve kritik infrastrukturağa ücüm etip, Ukrayinağa ücüm etmekten vazgeçmeyceklerini açıq-aydın bildirdiler. Mevamımız deñişmey: Ukrayina de-eskalasiya adımlarına azır, Rusiyege ise de-eskalasiya olması içün tesirli basqı kerek. Cenkler, istilâcınıñ cenkni devam ettirmek imkânı olmağanını duyğanda bite", — dep qayd etti o.
Zelenskıy qayd etti ki, dünyanıñ Rusiyege basqısı barışıqnı yaqınlaştıra, "Rusiyeniñ doğrudan ya da ğıyabiy destegi, Ukrayinağa yardımnıñ toqtatılması ve balistikadan qorçalavnıñ qıyınlaştırılması" ise barışıq içün çalışmaycaq.