Kiçik aynıñ 9-na keçken gecesi Rusiye arbiyleri Ukrayinanıñ dört vilâyetine pilotsız uçaqlarnen ücüm etti.
Dnipropetrovsk vilâyetiniñ Şahtersk qasabasında, vilâyetniñ arbiy memuriyetiniñ başı Aleksandr Ganjinıñ aytqanı kibi, Rusiye ücüminden doquz insan zarar kördi, olarnıñ arasında 13 yaşında qız. 57 yaşında qadın ağır alda buluna. Üç qatlı ev zarar kördi. Vasılevsk cemiyetinde üç şahsiy ev zarar kördi.
Harkiv vilâyetiniñ Bogoduhov şeerinde bir qadın ve 10 yaşında bala elâk oldı, daa üç insan yaralandı. Fevqulâde vaziyetler boyunca Ukrayina devlet hızmeti bildirgeni kibi, Rusiye arbiyleri şeerniñ şahsiy sektorına uçucısız uçaqlarnen ücüm etti.
Odesa vilâyetiniñ başı Oleğ Kiper bildirdi ki, Rusiye ordusı Odesa ve vilâyetine kütleviy bir darbe endirdi. Odesada bir insan elâk oldı, daa ekisi yaralandı. Uçaqlardan biri çoq qatlı evniñ damına uruldı, gaz borusı zararlandı. Bundan ğayrı, yengil maşnalar yandı, bir qaç evniñ fasadı ve camları zararlandı.
Volın vilâyetiniñ Novovolınsk şeerinde Rusiye ücüminden sebep energetik obyekt zarar kördi, dep tarif etti şeer yolbaşçısı Boris Karpus. Onıñ aytqanına köre, suv temizleyicileri ve bazı qazanlıqlar generatorlarda çalışa, vaziyet nezaret altında.
