Rusiye prezidenti Vladimir Putin iç ve halqara adise-vaqialar oña fayda ketirgenini köre ve Ukrayınada agressiv taktikada israrcı olacaqtır, dep bildirdi ABD Milliy istihbaratınıñ müdiri Avril Haines.
«Putinniñ Ukrayınağa qarşı quvetleşken agressiv taktikası, hususan Ukrayına energetik infrastrukturasına qarşı darbeleri, Ukrayınanı küreşniñ devamı oña köstergen zararnı arttıracaq ve ğalebe yolunı köstermeycek dep işandırmaq içün yapıla», – dedi Haines.
«Bu agressiv taktika devam etecektir ve cenk yaqın vaqıtta bitmeycektir», – dep qoştı o.
Bu künleri Beyaz ev Ukrayına ABD yañıdan başlağan arbiy qoltutuv programması çerçivesinde ilân etilgen yañı yardım paketinden silâ ala, dep ilân etti.
Ukrayına Tış işler naziri Dmıtro Kuleba Ukrayına ittifaqdaşları ğayretlerine baqmadan cedvelden artta qalalar, dep bildirdi. Diplomatnıñ aytqanına köre, paket ilân etilgen ve Ukrayına Silâlı Quvetleri topçusınıñ snarâdları artqan vaqıt arasında aralıq bar.
Ukrayına prezidenti Volodımır Zelenskıynıñ aytqanına köre, Ukrayına Amerika yardımı qararını beklegen yarım yılda Rusiye ordusı uruş meydanında teşebbüsni öz qoluna alıp oldı, kerekli silâ olsa, Ukrayına Silâlı quvetleri tek cebeni stabilleştirmek degil, ilerilep olur.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.