Ukrayınada Rusiye istilâsı sebebinden 546 bala elâk oldı, yaralanğanlarnıñ sayısı 1330 oldı – bu raqamlarnı mayısnıñ 9-nda Ukrayına Baş prokurorınıñ ofisi aydınlata.
Böylece, mayısnıñ 8-nde Rusiyeniñ Harkivge açqan ateşi neticesinde dört bala yaralandı – 8 yaşında qızçıq, 14 yaşında eki oğlan, 15 yaşında oğlan, mayısnıñ 7-nde Dnipropetrovsk vilâyetindeki Nikopolde darbe neticesinde 6 yaşında qızçıq yaralandı, mayısnıñ 6-nda Rusiyeniñ Sumı ve Harkiv vilâyetlerine endirgen ücümleri sebebinden 15 ve 14 yaşında balalar ve 16 yaşında qız yaralandı.
Baş prokurornıñ ofisi malümatına köre, eñ çoq bala böyle vilâyetlerde yaralandı: Donetsk – 530, Harkiv – 365, Herson – 150, Dnipropetrovsk – 137, Kyiv – 130, Zaporijjâ – 108, Mıkolayıv vilâyetinde – 104.
BM Ukrayına insan aqları monitoring missiyası bildirgenine köre, 2024 senesi mart ayında Ukrayınada eñ az 604 vatandaş öldürildi ya da yaralandı, bu raqam fevral ayına baqqanda 20 fayız daa çoq ola. Mart ayında Rusiye istilâsı neticesinde eñ az 57 bala elâk oldı ya da yaralandı – bu da fevral ayından eki qat ziyade ola.
BM, Rusiye Federatsiyasınıñ büyük istilâsı başlağanından Ukrayınada 10810 vatandaş ölümi ve 20556 vatandaşnıñ yaralanğanına dair malümatnı tasdıqladı. Teşkilât vatandaşlar arasında qurbanlarnıñ sayısı daa çoq, dep tahmin ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.