Noyabr 21-22 künleri Kiyevde "Qırım globalUkrayinanı Cenüpte añlav" Ekinci halqara konferentsiyası keçirilecek. Onıñ çerçivesinde Afrika, Asiya ve Latin Amerika memleketlerinden ekspertler Ukrayina ile işbirlikniñ çağıruvları ve istiqballerini muzakere etecekler. Bu aqta "Qırım platforması" ofisi haber ete.
Beyanatta qayd etilgeni kibi, tedbir çeşit memleketler arasında tecribesi ve körüşüvi deñişüvine, em de Ukrayina, hususan Qırım aqqında malümat tarqatuvına doğrultılğan.
Konferentsiyada Ukrayinanıñ Rusiyeniñ müstemleke siyasetinen küreşiniñ timsali olğan ve Afrika, Asiya ve Latin Amerika memleketleri içün BMT Nizamnamesiniñ bozuluvına reaktsiya, aşayt, energetik telükesizlik, em de müstemlekecilikni yeñüv tecribesi ceetinden müim olğan Qırım mevzusına ayrı diqqat ayırılacaq, dep aytıla haberde.
2014 senesi fevral ayında silâlı insanlar Qırım Muhtar Cumhuriyeti Yuqarı Şurası binasını, Qırım Muhtar Cumhuriyeti Nazirler Şurasını, Aqmescit ava limanını, Keriç parom keçitini ve diger strategik obyektlerni zapt ettiler. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda dünyanıñ çoqusı memleketleri tarafından tanılmağan yarımadanıñ statusı aqqında "referendum" keçirildi, onıñ neticelerine köre Rusiye Qırımnı öz terkibine kirsetti.
Halqara teşkilâtlar Qırım işğali ve ilhaqını qanunsız dep tanıdı ve Rusiyeniñ areketlerini takbih etti. Ğarp memleketleri iqtisadiy cezalarnı kirsetti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.