Ukrayinada Rusiye qanunsız şekilde ilhaq etken Qırım ve vaqtınca işğal etilgen topraqlarnıñ sakinleri içün pasportlarnı resmiyleştirüvniñ yañı qaideleri çalışıp başladı. Bu aqta Ukrayina prezidentiniñ Qırım Muhtar Cumhuriyetindeki temsilciligi haber ete.
Deñişmeler 2025 senesi dekabrniñ 25-nde işke tüşürilgen ükümetniñ №1709 qararınen kirsetile.
Eki vesiqanı — özüne ya da 14 yaşına qadar balalarğa ID-kart ve çetel pasportı içün vesiqalarnı bir ziyarette bermek mümkün. Vesiqalar Devlet migratsion hızmetiniñ bölüklerinded, memuriy hızmet merkezleri ya da Ukrayina ve çeteldeki "Pasportnıy servis" merkezlerinde qabul etile.
Qararda yaşağan yerni tasdıqlav, vaqtınca işğal etilgen topraqlarda yaşağan vatandaşlarnıñ şahsiyetlerini bilmek içün tedbirler belgilene.
Şimdi çalışmağan Devlet migratsion hızmeti ya da İç işler nazirliginiñ bölükleri (meselâ, vaqtınca işğal etilgen topraqlarda) tarafından berilgen 1994 senesiniñ vesiqası (kitapçıq şeklined pasport) olsa, şahsiyetini tasdıqlağan diger vesiqalarnı ilâve etmege imkân bar. Bu vaqtınca berilgen arbiy vesiqa, arbiy bilet, aydavcı ya da pensioner şeadetnamesi. Böylece vaqtınca işğal etilgen topraqlarnıñ sakinleri şahsiyetini tasdıqlamaq içün daa çoq imkân ala.
Muracaat etken kişi vesiqalarını berip olamasa, olarnı yazma arizasında qayd ete. Hadimler bu malümatnı teşkere.
Şahsiyet tesbiti ayrı bir müim adım ola. Bu vaqtınca işğal etilgen topraqlardan, hususan Qırım Muhtar Cumhuriyetinden çağına yetken Ukrayina vatandaşlarına tesir ete, meselâ, olarnıñ fotosüretli pasportları olmasa ve elinde tek doğuv şeadetnamesi ya da Rusiye memuriyeti bergen "vesiqaları" ola. Bu alda, yañı deñişmelerge köre, şahsiyet tesbiti artıq Ukrayina tışında da "Dokument" devlet müessisesiniñ bölüklerinde muracaat etkenniñ iştirakinen videokonferentsiya bağı rejiminde yapıla bile.