Ukrayina ve Rusiye "500-ge 500" formulası boyunca cenk esirlerini ekinci etapta deñiştirdi. Martnıñ 5-nde Ukrayinağa 200 cenk esiri qayttı, Rusiyege de aynı sayıda. Martnıñ 6-nda taraflar daa 300 insannı almaştırdı.
Ukrayina prezidenti Volodımır Zelenskiy haber etkenine köre, 300 arbiyden ğayrı, Kyiv eki adiy vatandaşnı qaytarıp oldı.
"Olarnıñ arasında Ukrayina Silâlı quvetleri, Milliy gvardiya, sıñır hızmetimizden balalar bar. Adiyler, serjant, zabitler. Ukrayinanı çeşit yönelişlerde imaye etkenler: Donetsk, Lugansk, Harkiv, Zaporijjâ, Herson yönelişlerinde, Mariupolde. Çoqusı bir yıldan ziyade esirlikte edi, bazıları – 2022 senesinden berli, – dep yazdı Zelenskıy. – Er birini hatırlaymız, ve bütün insanlarımıznı mıtlaqa qaytarmaq kerekmiz".
"Naş vıhod" areketiniñ koordinatorı İrina Krınina "Novaya gazeta Yevropı" neşirine bildirgenine köre, Rusiyege qaytqan arbiylerniñ 54%-ı 2025 senesi esir tüşti, 43%-ı – 2024 senesi.
"Bir çoqu Rusiyege qaytqanda kederlene bile: tuvğan evleri yerine olarnı Moskva civarındaki arbiy bölükte kazarma bekley, soñra ise kene bölüklerge ve cebege qaytuv. "Naş vıhod" areketine tuvğanları daa evel azat etilgen ve komandanlıq cenkke yollamağa istegen yüzlernen rusiyeli muracaat etti", – dep qayd etti o. Deñişüv Jenevada yapılğan añlaşmalar çerçivesinde keçe.