Faallerniñ aytqanına köre, neticelerni elde etmek içün çeşit menbalarnı qullanalar.
"Rusiyeniñ resmiy statistikası Qırım boyunca tahminen eki biñ insannıñ müsbet migratsion saldosını köstere, lâkin bu esasen emek migrantları ve qomşu Rusiyeden Qırımğa köçmege devam etkenler. Qırımlılar Ukrayina vatandaşları ise işğal etilgen yarımadanı kütleviy surette terk eteler. Neticede, yañı oquv yılında Qırım mekteplerinde keçken senege köre on biñge yaqın talebe azca oquycaq. Yalıñız "Avito" saytında Qırımda 12 biñ ev ve 33 biñ daire satıluvğa qoyulğan. Sebepler açıq-aydın — sıñırlavlar, qorquzuvlar ve işğalniñ devam etmesi şaraitlerinde Ukrayina vatandaşlığı olğan qırımlılar Qırım tışında daa yahşı yaşayış qıdırmaq isteyler", — dep tarif ettiler #LiberateCrimea Qırım faalleri.
Faallerniñ qayd etkenine köre, tamır ⁇ qırımtatar halqınıñ Qırımdan kütleviy köçüvi devam ete.
"Yazıq ki, qırımtatarlar Qırımnı qırımtatar cemiyeti içün hassas miqyaslarda terk ete, laf biñlernen insan aqqında kete. Çoqusı Almaniyağa, Türkiyege kete, meselâ, İstanbulda Ukrayina Baş konsullığına Ukrayina vesiqalarını almaq içün muracaat etkenlerniñ dörtte biri Qırımdan kele. Soñki eki buçuq yıl devamında Rusiyeniñ Ukrayinağa qarşı açqan cenkinden sebep, Avropanıñ bazı memleketlerinde qırımtatar diasporaları qat-qat arttı", — dep qayd ete #LiberateCrimea Qırım bölüginde.
Aprel ayında "Almenda" Vatandaşlıq maarifi merkezi, 2023 senesi işğal etilgen Qırımda tek 197 balanıñ ukrayin tilinde tasil almağa imkânı bar, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.