Ukrayina Silâlı quvetleri uçucısız sistemalarınıñ küçleri iyülniñ 8-nde gece Azaq deñizinde Rusiye "kölge flotunıñ" tankerlerine qarşı darbelerini devam ettirdi, dep bildirdi Ukrayina Silâlı quvetleri Uçucısız sistemalar küçleriniñ komandanı Robert Brovdid (lağabı "Madâr").
"Uçucısız sistemalar küçleriniñ quşları iyülniñ 8-nde gece Azaq deñizinde Rusiye kölge flotunıñ +9 tankerini işledi. 72 saat içinde 21 gemige ücüm etildi: kölge flotunıñ 19 tankeri, 1 yük taşıyıcısı ve Keriçte 1 parom".
Ukrayina Silâlı quvetleriniñ Uçucısız sistemalar küçleriniñ yolbaşçısı Qırım ve işğal etilgen cenübiy Ukrayina regionlarına qarşı darbeleri aqqında esabat bergen edi, berilgen malümatqa köre, Ukrayina Silâlı quvetleri 53 Rusiye nişanını urdı.
Bunıñ ögüne Brovdi sekiz Rusiye tankerine qarşı darbeler aqqında bildirip, "Azaq deñizinde Qırım içün benzin küreşi devam ete", dep ayttı.
Ukrayina telükesizlik hızmeti keçken afta "Canköy" ava bazası ve işğal etilgen Ukrayina topraqlarında diger nişanlarğa ücüm etti, dep esabat bere.
Haberge köre, middle strike alanında çalışqan Ukrayina telükesizlik hızmetiniñ "Alfa" arbiy bölükleri keçken afta işğal etilgen Ukrayina topraqlarında "duşmannıñ esas nişanlarına qarşı büyük iş" yaptı. "Canköy" arbiy ava bazası aqqında aytıla – anda, Ukrayina telükesizlik hızmetiniñ malümatına köre, "Orion" Rusiye darbe-istihbarat uçucısızları içün retranslâtorlar ve silâ ve arbiy tehnika anbarlarına ücüm etildi.
Berilgen malümatqa köre, mahsus bölükler Keriçte "Qırım" limanınıñ infrastrukturasına, Novogrigorovka ve Krasnoye mesken yerlerinde silâ ve yanıcı-yağlayıcı maddeler anbarlarına ücüm etti.
"Ukrayina telükesizlik hızmeti Donetsk vilâyetindeki Pokrovsk civarında uçucısız, yerustü kompleksler ve silânen logistik habnı yoq etti. Bu obyekt bu yönelişte Rusiye ordusınıñ logistik destegini temin etken edi", – dep aytıla haberde.
Muarririyet darbe neticelerini mustaqil şekilde tasdıqlap olamay. Rusiye arbiy komandanlığı zararları aqqında bildirmedi.
Rusiye Mudafaa nazirligi Rusiye regionları, Qırım ve Azaq ve Qara deñizlerinde urıp tüşürilgen 415 uçucısız aqqında bildirdi. Tüşürilemegen dronlarnıñ sayısı aydınlatılmay.
İyün ayında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.