Rusiye ordusı iyünniñ 2-ne keçer gecesi Ukrayinağa darbe uçucısızları ve ava, deñiz ve yerustü raketalarınen ücüm etti, dep bildire Ukrayina Silâlı quvetleriniñ Ava küçleri komandanlığı.
Arbiylerniñ malümatına köre, darbeniñ esas yönelişleri Kyiv, Dnipro, Harkiv, Zaporijjâ, Poltava vilâyeti ve diger regionlar oldı. Ava quvetleriniñ radiotehnik orduları 729 ava ücüm vastasını qayd etti – 73 raketa ve 656 çeşit uçucısız:
- 8 3M22 "Tsirkon" gemilerge qarşı raketası (işğal etilgen Qırım ve Kursk vilâyetinden uçurıldı)
- 33 "İskander-M" ballistik raketası (Brânsk, Kursk, Rostov vilâyeti ve işğal etilgen Qırım)
- 27 X-101 qanatlı raketası (Vologod vilâyeti)
- 5 "Kalibr" qanatlı raketası (Hazar deñizi)
- 656 "Şahed", "Gerber", "Italmas" uçucısızları, "Banderol", "Parodiya" taqlit dronları (Brânsk, Kursk, Orel, Millerovo, Primorsko-Ahtarsk, işğal etilgen Qırımda Sarabuz ve Çavda burnu)
İlk malümatqa köre, ava mudafaa quvetleri 642 nişannı zararsız alğa ketirdi – 602 çeşit uçucısız ve 40 raketa, hususan: 11 "İskander-M" ballistik raketası, 26 X-101 qanatlı raketası, 3 "Kalibr" qanatlı raketası.
"Saat 08.30-ğa qadar 30 ballistik, 3 qanatlı raketa ve 38 yerde 33 darbe uçucısızınıñ ücümi qayd etildi, 15 yerde uçucısız parçaları qayd etildi", – dep aytıla haberdeye.
Rusiyeniñ Kyivge qarşı darbesi neticesinde, şeer akimiyetiniñ malümatına köre, 58 insan yaralandı, şu cümleden eki bala, dört insan elâk oldı. Dniproda yedi elâk olğan kişi aqqında malümat bar.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.