Rusiye ordusı gece devamında Ukrayinağa "Kinjal" aerobalistik raketası ve 147 darbe uçucısızınen ücüm etti, dep haber etti Ukrayina Silâlı quvetleriniñ Ava küçleri mayısnıñ 28-nde.
Ukrayina arbiyleriniñ malümatına köre, raketa Rusiyeniñ Lipetsk vilâyetinden, "Şahed", "Gerber", "Italmas" ve diger dronlar Rusiyedeki Brânsk, Kursk, Orel, Millerovo, Primorsko-Ahtarsk ve işğal etilgen Qırımnıñ Sarabuz qasabasından ve Çavda burnundan uçurıldı.
Ukrayina komandanlığı ava mudafaasınıñ 138 duşman uçucısızınıñ zararsız alğa ketirgenini qayd etti.
"Kinjal" aerobalistik rakeyetası ve 9 darbe uçucısızınıñ 7 yerde darbe endirgeni, 6 yerde tüşürilgen parçalar olğanı qayd etildi", – dep aytıla haberde.
Aqşam üstü Ava quvetleri Hmelnıtskıy vilâyeti tarafına, ihtimal, Starokostântınivge raketa uçqanı aqqında tenbiledi. Vilâyet yolbaşçısı Serğiy Türın Rusiye ücümi neticesinde "elâk olğan, yaralanğanlar ya da yıquvlar aqqında haber olmadı", dep bildirdi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.