Rusiye ordusı gece Ukrayinağa 14 ballistik ve 8 qanatlı raketanen, 524 çeşit uçucısıznen ücüm etti, bir qısmı işğal etilgen Qırımnıñ Sarabuz qasabasından uçurıldı, dep haber ete Ukrayina Silâlı quvetleri Ava küçleriniñ telegram kanalı.
Ukrayina Silâlı quvetleri qayd etkenine köre, darbeniñ esas yönelişi – Dnipro ve Dnipropetrovsk vilâyeti, Odesa, Çerniğiv vilâyetleri ve Zaporijjâ da ücümlerge oğradı.
İlk malümatqa köre, saat 08:30-ğa qadar ava mudafaası 507 nişannı zararsız alğa ketirdi – 4 "İskander-K" qanatlı raketası ve 503 farqlı uçucısız.
"Umumen Ava küçleriniñ radiotehnik ordusı 546 ava ücüm vastasını (22 raketa ve 524 uçucısız) qayd etti: 14 "İskander-M"/"S-400" ballistik raketası (uçurılğan yerler – Rostov vilâyeti, vaqtınca işğal etilgen Qırım Muhtar Cumhuriyeti); 8 "İskander-M" qanatlı raketası (uçurılğan yerler – vaqtınca işğal etilgen Qırım Muhtar Cumhuriyeti); Shahed, Gerber, Italmas, "Parodiya" uçucısızları olğan 524 darbe uçucısızı: Rusiyeniñ Brânsk, Kursk, Örel, Millerovo, Primorsko-Ahtarsk yönelişleri, vaqtınca işğal etilgen Donetsk, vaqtınca işğal etilgen Qırım Muhtar Cumhuriyetinde Sarabuz qasabası", – dep qayd etti Ukrayina Silâlı quvetleriniñ Ava küçleri.
Ukrayina arbiyleri 34 yerde 18 raketa ve 16 darbe uçucısızınıñ ücümini ve 11 yerde urulğan uçucısız parçaları tüşkenini qayd etti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.