Rusiye arbiyleri aprelniñ 1-ne keçer gecesi Ukrayinağa Rusiyeniñ beş yönelişinden, işğal etilgen Qırımnıñ Sarabuz qasabasından ve Ukrayina şarqında işğal etilgen Donetskten 339 darbe uçucısızınen ücüm etti, dep haber etti Ukrayina Silâlı quvetleriniñ Ava küçleri.
"İlk malümatqa köre, saat 08:00-ge qadar, ava mudafaası memleketniñ şimali, cenübi, şarqı, ğarbi ve merkezinde Shahed, Gerber, Italmas ve diger uçucısızlar olğan 298 duşman uçucısızını urdı/tüşürdi, - dep aytıla haberde.
Ukrayina arbiyleriniñ malümatına köre, 11 yerde 20 darbe uçucısızınıñ ücümi ve beş yerde parçalarınıñ tüşkeni qayd etildi.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.