Qırım Muhtar Cumhuriyeti ve Aqyar sakinleriniñ aqlarından vekâletliniñ temsilcisi Elvin Kadırov Türkiye akimiyetine ağır hasta olğan qırımlı siyasiy mabüslerniñ cedvelini berdi, dep haber ete Ukrayina ombudsmeni Dmıtro Lubinets.
Kadırov Türkiye vekillerinen körüşip, Qırımda söz serbestliginiñ bozuluvı ve barışıq toplaşuvlarnıñ yasağı, qırımtatarlarğa qarşı ana tilini ögrenüvde repressiyalar ve siyasiy ve diniy meselelerde sebepsiz apis cezaları aqqında tarif etti.
«Vekil qayd etti ki, rusiyeliler qanunsız mahküm etilgen Ukrayina vatandaşlarını işkencege oğratmağa devam ete, mabüslerge yeterli derecede tibbiy yardım köstermeyler, bunıñ neticesinde endi eki qırımlı siyasiy mabüs Rusiye zindanlarında can berdi. Ve bugünki vaziyetke köre, Ukrayinanıñ qanunsız mahküm etilgen 40-tan ziyade vatandaşı tibbiy yardımğa pek muhtac, olarnıñ çoqusı tamır qırımtatar halqınıñ vekilleridir», – dep bildirdi Lubinets.
Qırımtatar resurs merkezi bildirgenine köre, Qırımda Rusiye uquq qoruyıcıları yarımadanıñ saqat ve ağır hasta olğan yedi sakinini taqip ete, olardan altısı apishanede tutula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.