Ukrayina Tış işler nazirligi, memleketniñ ABD tarafından "sert destegi" bar, Donald Trampnıñ prezident saylavlarında ğalebesi ise barışıq esnasını tezleştire bile, dep tüşüne, dep bildirdi noyabrniñ 22-nde Kıyivde matbuat konferentsiyasında Ukrayina Tış işler nazirliginiñ yolbaşçısı Andriy Sıbiğa, dep haber ete Azatlıq Radiosı.
"Prezident Trampnıñ ğalebesini — "quvet vastasınen barışıq" yanaşuvı ile barışıq esnasını tezleştirmek içün qoşma bir şans olaraq köremiz. Ve bu felsefege esaslanıp, bu yanaşuvğa esaslanıp, biz prezident Trampnıñ yañı memuriyeti ile munasebetlerimizni qurmağa ümüt etemiz", — dep ayttı o.
Sıbiğa, Ukrayina Amerikanıñ — em eki firqa, em de Amerika halqınıñ destegine saip, dep qoştı.
"Biz er vaqıt böyle aytamız, bizim küreşimiz mında ve Rusiyeniñ Ukrayinağa qarşı tecavuzı mında — bu tek Ukrayina aqqında degil, bu dünya tertibiniñ ğayrıdan tiklenüvi, halqara uquq, BMT nizamnamesi, topraq bütünligi ve suverenitetine ürmet esaslarına esaslanğan dünya telükesizlik mimarlığınıñ ğayrıdan tiklenüvi aqqında. Ve, şuña köre, şimdiki yardım bizge hayriye degil, bu öz vatandaşlarımıznıñ, öz memleketlerimizniñ, eñ yaqın ittifaqdaşlarımıznıñ telükesizligine konkret bir issedir, çünki söz umumiy transatlantik telükesizligimiz aqqında da kete", — dep bildirdi Ukrayina Tış işler naziri.
ABD prezident saylavlarında Donald Tramp ğalebe qazandı, memuriyet deñişüvi ve akimiyetniñ berilmesi yanvarniñ 20-nde keçmeli.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.