Ukrayına Tış işler nazirligi Qazahistan, Ermenistan, Özbekistan, Tacikistan, Qırğızistan ve Turkmenistan liderleriniñ Moskvadaki arbiy paradqa kelgenini Ukrayına halqına sayğısızlıq kösterüv dep adlandırdı. Bu aqta nazirlikniñ beyanatında aytıla.
«Bu çetel devletleri liderleriniñ Avropada Ekinci cian cenki vaqtından berli körünmegen büyüklikte cenk başlatqan arbiy cinayetçinen beraber açıq tedbirlerde iştirak etmesini Ukrayınağa qarşı ahlâqsız ve duşman bir adım, yaşamaq ve serbest olmaq içün küreşken Ukrayına halqına sayğısızlıq kösterüv olaraq köremiz», – dep aytıla haberde.
Müessise Merkeziy Asiya ve Kavkaz halqları 78 yıl evelsi zaferge büyük isse qoştı, dep qayd etti. Amma şimdi Kremlniñ «sahte bir arekette» qullanılmasına lâyıq degil.
Aynı vaqıtta Aleksandr Lukaşenkonıñ mayıs 9 paradında iştirak etkenini Ukrayına Tış işler nazirligi izaatlamadı.
Moskvada mayısnıñ 9-nda Zafer bayramı munasebetinen arbiy parad ötkerildi. Minberde Rusiye lideri Vladimir Putinnen beraber Ermenistan baş naziri Nikol Paşinân, Qazahistan prezidenti Kasım-Jomart Tokayev, Qırğızistan prezidenti Sadır Japarov, Tacikistan prezidenti Emomali Rahmon, Özbekistan prezidenti Şavkat Mirzioyev ve Beyazrusiyeni temsil etken Aleksandr Lukaşenko (ABD, Avropa Birligi ve Ukrayına Beyazrusiye ükümranını tanımay) bar edi.
Kütleviy haber vastalarınıñ malümatına köre, mayıs 9 paradlarınıñ keçirilüvi Rusiyeniñ 20-den çoq şeerinde lâğu etildi. Kaluga, Râzan, Orel, Saratov, Lipetsk, Yelets, Belgorod ve Tümen «telükesizlik maqsadınen» parad keçirmekten vazgeçtiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.