Ukrayina telükesizlik hızmeti Arbiy deñiz quvetleri ile birlikte Novofederivka yaqınlarında Rusiyeniñ "Saq" arbiy uçaq alanına kütleviy darbe endirdi. Bunı LIGA.net neşri Ukrayina telükesizlik hızmetindeki öz menbalarına atıf eterek bildire.
"Uçaq alanında eñ az 12 arbiy uçaq (Su-24 i Su-30) ve "Pantsir" zenit-raketa kompleksi bar edi. Daa anda Mojaher dron operatorlarını azırlav bazası yerleşe edi. Tam bu dronlarnı rusiyeliler öz ava ücümlerni koordinatsiya etmek içün ve darbe endirgen dron olaraq qullanalar", - dep yazıla bildirmede.
Haber etilgeni kibi, başta Rusiye ava mudafaası sistemasını zayıflaştırmaq içün dronlar qullanılğan, soñra ukrayinalı arbiyler "Neptun" raketalarını uçurtqan. Berilgen malümatqa köre, darbeler "nişanğa barıp urğan ve tehnikağa ciddiy zarar ketirgen".
Al-azırda Ukrayina Telükesizlik hızmetinin resmiy beyaatı yoq. Bu malümatnı mustaqil menbalardan teşkermek şimdilik imkânsız.
Rusiye telegram kanalları sentâbrniñ 21-nde gece Qırımda - Aqyar, Saq ve Aqmescit rayonlarında ve Kezlevde patlavlar yüz bergeni aqqında haber ettiler.
İnternette uçıp keçken dron sesi ve Ava Mudafaası sistemasınıñ işi eşitilgen videolar yayınlandı. Bundan ğayrı, "Belbek" ve "Saq" arbiy uçaq alanlarında "Pantsir" türü zenit-raketa kompleksiniñ çalışqanı aqqında resmiy olmağan haberler de bar.
Biraz soñra iç bir delil köstermeden RF Mudafaa nazirligi Qara deñiz akvatoriyası ve Qırım üzerinde 19 dron urıp tüşürilgenini bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.