Ukrayina pilotsız sistemaları quvetlerinde, Oraqnıñ 9-nda saba olğan vaziyetke köre, 14 Rusiye gemisine ücüm etilgenini bildirdiler. Bu raqamlar saba SBS saytında derc etildi.
SBS, ücüm etilgen gemilerniñ adı ve yeri aqqında şimdilik bir şey aytmadı. Bu malümatnıñ tasdıqlanması şimdilik yoq.
Rusiye Federatsiyasınıñ Rostov vilâyetiniñ yolbaşçısı Yuriy Slüsar içtimaiy ağlardaki saifelerinde bildirdi ki, Taganrog körfezinde dronlar eki tankerge ücüm etti, olar, onıñ aytqanına köre, mehanik zarar kördi. Rusiye akimiyeti ve arbiyleri başqa zarar körgen tankerler aqqında malümat bermediler.
Oraqnıñ 8-nde ZSU gece Azaq deñizinde Rusiye Federatsiyasınıñ kölge flotunıñ 9 tankerine ücüm etilgenini bildirdirgen ediler.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.