Ukrayina Silâlı quvetleriniñ Baş ştabı, Keriç köprüniñ demiryol töşemesine "Neptun" raketalarınen ücüm etilgenini bildirdi

Tasviriy resim

Boşnıñ 19-na keçer gecesi Keriç köprüniñ demiryol töşemesine endirilgen darbe Ukrayina Arbiy-deñiz quvetleriniñ "Neptun" raketa komplekslerini qullanıp endirildi. Ücüm neticesinde demiryol töşemesi zarar kördi. Bu aqta Ukrayina Silâlı quvetleriniñ Baş ştabı haber etti.

"Nişan urulğan, köpürdeki areket qapatılğan. Demir yol töşemesi zarar kördi", — dep aytıla Ukrayin arbiy komandanlığınıñ haberinde.

Ukrayina Silâlı Quvetleriniñ Baş Ştabı, Keriç köprü Ukrayinanıñ cenübindeki Rusiye askerleri içün yaqıt, silâ, arbiy tehnika taşığan esas teminat yollarından biri dep qayd etti.

Bundan ğayrı, Ukrayina Silâlı quvetleriniñ Baş ştabı evelki Ukrayin darbeleri neticesinde daa üç avtomobil köprüniñ bozulğanını tasdıqladı. İdareniñ malümatına köre, Boşnıñ 15-nde Lugansk vilâyetinde Prişib yanında Severskiy Donets özeni üstündeki köpür ve Rostov vilâyetinde Taganrog yanında Mius özeni üstündeki keçit zarar kördi. Rostov vilâyetindeki Lakedayemonovka yanındaki Mius deryası üstündeki daa bir köpür Boşnıñ 14-nde zararlandı.

Bu obyektlerniñ zarar derecesini mustaqil sürette teşkermek daa mümkün degil.

Bundan evel Boşnıñ 19-na keçer gecesi Keriç köprüne daa bir ücüm endirilgeni aqqında haber berildi. Keriç civarında bir qaç patlav eşitildi, şaatlar köpürniñ demiryol qısmına uruluvlar aqqında haber ettiler. Bu zararnıñ tasdıqı daa yoq.

Rusiye tarafından tayinlengen Qırım başı Sergey Aksönov daa bir ücümni tasdıqladı ve yol yürüşiniñ vaqtınca qapatılğanı aqqında haber etti.

Soñki bir qaç kün içinde bu Keriç köprüne endirilgen üçünci ücümdir.