2026 senesi Oraqnıñ 16-na keçer gecesi Ukrayina mudafaa quvetleri altı tanker, eki çekici, cermay bazası, köpür ve duşmannıñ diger arbiy obyektlerini urdı, dep haber ete Ukrayina mudafaa quvetleriniñ Baş ştabı.
Ştabnıñ malümatına köre, Qara ve Azaq deñizlerinde altı tanker ve eki çekici zarar kördi, bu tankerler sanktsiyalarnı bozaraq, Rusiye cermayını taşımaq içün qullanıla.
Bundan da ğayrı, Ukrayina Silâlı quvetleriniñ Baş ştabı Donetsk vilâyetiniñ işğal etilgen Şahtersk şeerinde "Şahtersk" neft bazasınıñ zarar körgenini bildirdi.
Ukrayina arbiyleri Rusiye Federatsiyası arbiyleri logistika içün qullanğan Zaporijjâ vilâyetiniñ Primorsk civarındaki avtomobil köpürini ve Qırımnıñ Çonğar rayonındaki "Sivaş" demiryol köpürini, Lugansk vilâyetiniñ Novodaryivka rayonında duşmannıñ radioelektron küreş vastalarınıñ anbarını yoq etkenlerini bildirdi.
Aynı zamanda Ukrayina Silâlı quvetleriniñ Baş ştabı Rusiye Federatsiyasınıñ Saratov vilâyetinde "Engels" uçaq alanınıñ zarar körgeni aqqında içtimaiy ağlardaki bildirüvlerni tefsir etmedi.
Rusiyeniñ keñ kölemli basuvı başlanğan soñ, Rusiye Federatsiyası ve Rusiye tarafından işğal etilgen Ukrayina topraqlarındaki çeşit obyektler ava ücümlerine oğray.