Ukrayına arbiyleri ücümni devam ettirip, bir qaç yönelişte ilerilemekte, dep bildirdi Ukrayına mudafaa naziriniñ muavini Ğanna Malâr.
Onıñ aytqanına köre, bir künde Bahmut yönelişinde Ukrayına silâlı quvetleri 200-500 metr ileriledi, Zaporijjâ vilâyetinde ise 300-500 metr ileri keçti.
«Berdânsk yönelişinde Makarivka yaqınlarında uruşlar devam ete. Mariupol yönelişinde Novodanılivka ve Novopokrovsk rayonlarında çatışmalar devam ete», – dedi Malâr.
Nazir muavini bildirgenine köre, bir künde Rusiye ordusı zenit-raketa kompleksi, top batareyası, 2 radiolelektron küreş kompleksi, 10 araba tehnikasız qaldı.
Rusiye akimiyeti bu aqta resmiy malümat bermedi. Bu malümatnı mustaqil menbalardan teşkermek imkânsız ola.
İyünniñ başında Ukrayına ordusı ücümge keçti, dep haber etildi. Ukrayına tarafı ücüm areketleri aqqında resmiy malümat bermedi. Ukrayına Mudafaa nazirligi qayd etkenine köre, qarşı ücüm aqqında açıq-açıq ilân etilmeycek.
Ukrayına prezidenti Volodımır Zelenskıy iyünniñ 10-nda ücüm haberlerini izaatladı. «Ukrayınada belli mudafaa ve qarşı ücüm areketleri yapıla, angi seviyede – tafsilâtlarını aytmaycam», – dedi o.
İyünniñ 12-nde Ukrayına mudafaa nazirligi bildirgenine köre, bu künge qadar Ukrayına arbiyleri yedi mesken yerni azat etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.