Ukrayina tünevin ortaqlarından ava mudafaası sistemaları içün raketalarnı aldı, olar Rusiyeniñ kütleviy ücümini toqtatmağa yardım etti, dep bildirdi Ukrayina prezidenti Volodımır Zelenskıy.
Onıñ malümatına köre, gece Rusiye quvetleri Ukrayinağa pek çoq ballistik ve qanatlı raketalarnen ve 300-den ziyade deronnen ücüm etken.
"Ücümden bir kün evel, biz kerekli raketalarnı elde ettik, ve bu bayağı yardım etti. Er bir destek paketi müimdir. Patriot, Nasam ve diger ava mudafaası sistemaları içün raketalar pek müimdir. Bütün diplomatik sistemamıznıñ esas vazifesi — Ukrayinanıñ yeterli qadar ava mudafaası olması içün çalışmaq. Ve ortaqlar bizni oñaytsız alğa qaldırmamalı, çünki bu insanlarnıñ ayatını qorçalamaq içün kerçek şeydir", — dep yazdı o telegramda.
Zelenskıynıñ bildirgenine köre, eñ qıyın vaziyet Kıyivde, çoq mesken ev qızdıruvsız qala.
Rusiye ordusı gece Ukrayinağa kütleviy bir darbe endirdi. Yerli akimiyetniñ bildirgenine köre, Kıyivde Rusiye ücüminden bir insan zarar kördi, sol yalıda yarıq ve suv teminatı yoq.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.