Sentâbrniñ 15-ne keçer gecesi Rusiye arbiyleri Ukrayinağa Rusiyeniñ üç yönelişinden, işğal etilgen Donetskten ve işğal etilgen Qırımdaki Sarabuz qasabasından 200 dronnen ücüm etti, dep haber ete Ukrayina Silâlı quvetleriniñ Ava küçleri.
"İlk malümatqa köre, 08:00-ge qadar ava mudafaası Shahed, Gerber ve diger dronlar olğan 187 duşman uçucısızını urdı ya da bastırdı. Yedi yerde duşmannıñ ava ücüm vastası qayd etildi, üç yeyerde ise parçalar tüşti", – dep aytıla haberde.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.