Mudafaa küçleri tünevin aqşam ve gece işğal altındaki Ukrayina topraqlarında ve Rusiyeniñ sıñır vilâyetlerinde Rusiye arbiy obyektlerine darbeler endirdi, dep haber ete Ukrayina Silâlı Quvetleri Baş ştabı aprelniñ 17-nde.
Bundan ğayrı, Qırımnıñ ğarbinde Aqmeçitte desant-ücüm katerleri olğan anbarğa qarşı darbe aqqında haber etile.
"Silâlı ve arbiy tehnika tamiri ve hızmet bazası ücümge oğradı (Klinkino, Donetsk vilâyetiniñ vaqtınca işğal etilgen topraqları), logistik hab (Manguş, Donetsk vilâyetiniñ vaqtınca işğal etilgen topraqları) ve desant-ücüm katerleri anbarı (Aqmeçit, Qırım Muhtar Cumhuriyetiniñ vaqtınca işğal etilgen toprağı)", – dep bildire Ukrayina komandanlığı.
İşğal etilgen Lugansk vilâyetinde Dolgoye mesken yeri civarında komandan-nezaret noqtası ve Rusiyeniñ Kursk vilâyeti Tetkino rayonlarında dronlarnı idare eetüv noqtalarına qarşı, Zaporijjâ vilâyetinde işğal etilgen Üspenovka ve Zelenoye qasabalarına qarşı darbeler aqqında bildirile.
Haberlerge köre, Ukrayina ordusı Herson vilâyetiniñ Skadovsk, Donetsk vilâyetiniñ Panteleymonovka ve Lugansk vilâyetiniñ Dovjansk civarlarında Rusiye silâ anbarlarına ücüm etti.
Lugansk vilâyetiniñ Sabovka ve Rovenök rayonlarında maddiy-tehnik vastalar ve yaqıcı-yağlayıcı madde anbarları ücümge oğradı.
Ukrayina Silâlı Quvetleriniñ Baş ştabı haber etkenine köre, evelki darbelerniñ neticesinde:
Aprelniñ 9-nda Örlinskoye rayonında (Donetsk vilâyeti) uçucısız laboratoriyası yoq etildi
Aprelniñ 16-nda Rusiyeniñ Belgorod vilâyetindeki Çernovets köyü civarında "Nebo-M" radiolokatsion stantsiyası ücümge oğradı
Aprelninö 15-nde Rostov vilâyetindeki Novomaryevkada "Podlet" radiolokatsion stantsiyası ücümge oğradı.
Ukrayina ştabı qayd etkenine köre, Rusiye ordusınıñ ğayıpları ve körgen zararı ögrenile.
Muarririyet bu malümatnı mustaqil şekilde teşkerip olamay.
Daa evel haber etilgenine köre, aprelniñ 17-ne keçer gecesi Qırımda patlavlar ve Rusiye ava mudafaasınıñ işi eşitildi. Aqyarda ava telükesi ilân etildi, Keriç köprü qapatıldı.
Rusiye komandanlığı darbe aqqında bildirmedi, tek Rusiye regionlarında ve işğal etilgen Qırımda urıp tüşürilgen 62 dron aqqında haber etti. Bu malümatnıñ delili kösterilmedi.
Rusiyeniñ büyük istilâsı başlağan soñ Rusiye obyektleri ava darbelerine oğray. 2024 ve 2025 seneleri ücümlerniñ nişanı eñ çoq cermay zavodları oldı. Ukrayinadaki Rusiye obyektleri de darbelerge oğray.
Ukrayina Silâlı quvetleriniñ Baş ştabı ücümlerniñ çoqusını tasdıqlap, Ukrayina Mudafaa quvetleri "Rusiye işğalci ordusınıñ cenk imkânlarını eksiltmek ve Rusiyeni Ukrayinağa qarşı silâlı istilâsını toqtatmasına mecbur etmek içün muntazam sürette tedbir ala", dep bildirgen edi.