Ukrayina Tış işler nazirligi Rusiye tarafınıñ Kyivge qarşı yañı darbeleri qorquzuvlarından soñ Ukrayina tarafı Rusiye tarafından Kyiv ve diger Ukrayina şeerleri içün telüke seviyesi keçken yıllar ve aylarğa köre aynı seviyede qala, dep bildirdi.
"Ukrayina Tış işler nazirligi devletimizde cenk vaqtında çalışmağa devam etken ve Rusiye şantajı ve qorquzuvlarını red etken bütün çetel diplomatik missiyaları, çetel diplomatlarına samimiy teşekkürlerini bildire. Dört yıl ve üç aydan ziyade Rusiye Ukrayinanıñ paytahtına qarşı ölüm ketirgen raketa ve dronlarnı qullana. Darbeler bir afta bile toqtamadı", – dep aytıla mayısnıñ 25-nde aqşam aydınlatılğan beyanatta.
Ukrayina Tış işler nazirligi qayd etkenine köre, bu vaziyette Rusiyeniñ yañı qorquzuvları "şantajdan başqa bir şey degil".
"Moskva ücümleri çetel diplomatik korpusını qorquzmaq içün yapılğanını tanıy. Bu istilâcı devletke qarşı halqara-uquq esnaslarında qıymetli bir delil olacaq", – dep aytıla haberde.
Ukrayina nazirligi muracaatta bulunğan çetel diplomatik missiyalarınıñ telükesizligini quvetleştirmege yardım etmege azır, dep qayd etti.
"Söz sırası, bütün ortaq ve ittifaqdaşlarımızğa hatırlatamız, Kremlniñ qorquzuvlarına eñ yahşı cevap istilâcığa qarşı basqını quvetleştirmek ve Ukrayinağa qoltutmaq, hususan ava mudafaasınıñ imkânlarını pekitmek olacaq. Moskva halqara toplulıqtan doğru ve bir signallar almalı: birlik, küç ve printsipiallik", – dep qayd etti Ukrayina Tış işler nazirligi.
Mayısnıñ 25-nde Rusiye Tış işler nazirligi Kyivde "qararlar alınğan merkezlerge ve komandanlıq noqtalarına" qarşı darbelerni ilân etti. Rusiye nazirligi "çetel vatandaşlarını, şu cümleden diplomatik missiya ve halqara teşkilâtlarnıñ vekillerini" şeerni tez terk etmek kerek, dep tenbiley.
Ukrayina Tış işler naziri Andriy Sıbiğa Rusiye Federatsiyası Tış işler nazirliginiñ beyanatını izaatlap, bugün 70-ten ziyade çetel diplomatik missiya vekilleri Kyivde Rusiye darbesiniñ yerlerini ziyaret etti.
"Ortaqlarımıznen Rusiyeniñ şantajı tesirine oğramamaq kerek, dep muzakere etemiz", – dedi Sıbiğa.
AB Kyiv temsilciliginiñ yolbaşçısı Katarina Maternova bildirgenine köre, Rusiyeniñ tenbisi telâşqa yol açmaq içün yapıldı: "Rusiye qorqu saçmağa istey. Telâş. Ukrayinanıñ izolâtsiyası. Bu işke yaramaz. AB bir yerge ketmey. Kyivde qalamız. Ukrayinanen beraber qalamız".
ABD Devlet kâtibi Marko Rubio Rusiye Tış işler naziri Sergey Lavrov telefonda Kremlniñ tenbisi aqqında hatırlatıp, Amerika tarafını "Kyiv pek telükeli yer olacaq" dep tenbilegenini bildirdi. Aynı vaqıtta Rubio "Kyiv bir qaç yıldan berli pek telükeli yer ola", dep qayd etti.
Onıñ aytqanına köre, Rusiyeniñ Ukrayinağa qarşı darbeleri, yaqında olğan kütleviy ücüm "cenk bitmeli" ve ABD mında "konstruktiv ve faydalı rol oynamağa azır".