Rusiye ordusı sentâbrniñ 24-ne keçer gecesi Ukrayinağa "Tsirkon" gemilerge qarşı raketaları, "İskander-M"/S-400/KN-23 ballistik raketaları ve 282 darbe uçucısızınen ücüm etti, bir qısmı Rusiye işğal etken Qırımnıñ Sarabuz qasabasından uçurıldı, dep bildirdi Ukrayina Silâlı quvetleriniñ Ava küçleri. Ukrayina arbiyleri ballistik raketalarnıñ sayısını bildirmey.
Darbeniñ esas yönelişi Odesa ve Kyiv vilâyetleri oldı, dep bildirdi Ukrayina Silâlı quvetleri.
"İlk malümatqa köre, saat 08:00-ge qadar ava mudafaası 227 nişannı urdı/bastırdı: 4 "Tsirkon" gemilerge qarşı raketası; 3 "İskander-M"/S-400/KN-23 ballistik raketası, 1 "Banderol"/"Dan-T"; 219 Shahed, Gerber ve diger dron olğan duşman uçucısızı", – dep aytıla haberde.
Ava küçleriniñ malümatına köre, 13 yerde darbe qayd etildi, 10 yerde parçalar tüşti.
"Ücüm devam ete, ava boşluğında onlarnen duşman uçucısızı bar. Telükesizlik qaidelerine riayet etiñiz", – dep tenbiledi arbiyler.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.